ಬದುಕು

ನಾಲ್ಕು ದಿನದ ಬದುಕಿನ ಪುಸ್ತಕದಲ್ಲಿ
ಮುಗುಳ್ನಗೆ ಮುಖಪುಟ ವಾಗಿರಬೇಕು
ಹಿಂಬದಿಯ ಪುಟದಲ್ಲಿ ತಾಳ್ಮೆ ಇರಬೇಕು
ಒಳ ಮುಖದ ಪುಟಗಳಲ್ಲಿ ಸ್ಥೈರ್ಯವಿರಬೇಕು

ಬಣ್ಣ ಬಣ್ಣದ ಚಿತ್ತಾರದ ಪುಟಗಳಲ್ಲಿ
ಕೂಡಿ ಆಡಿ ನಲಿಯುವಾಗ ಗೆಳೆತನವಿರಬೇಕು
ಮಾತೃ ಛಾಯೆಯ ವಾತ್ಸಲ್ಯದ ಆರೈಕೆ ಇರಬೇಕು
ಭ್ರಾತೃತ್ವದ ಉಯ್ಯಾಲೆಯ ತೂಗಾಟವಿರಬೇಕು

ಪುಟಿದೆದ್ದ ಆದರ್ಶ ದಾಂಪತ್ಯದಲ್ಲಿ
ನೋವು ನಲಿವಿನ ಶೃಂಗಾರವಿರಬೇಕು
ಒಬ್ಬರನ್ನೊಬ್ಬರು ಗೌರವಿಸುವ ನೋಟವಿರಬೇಕು
ಸರ್ವಜ್ಞನ ಕಿಚ್ಚನ ತಾಣವಾಗಿರಬೇಕು

ಕೊನೆಗೊಳ್ಳುವ ಪುಟಗಳ ಧ್ಯಾನದಲ್ಲಿ
ಜೀವನದ ಸಂತೃಪ್ತಿಯ ಭಾವವಿರಬೇಕು
ಹರಿನಾಮವ ಮನದುಂಬಿ ಭಜಿಸಬೇಕು
ಸಾರ್ಥೈಕ್ಯದ ಅರಿವಿನ ಗುರುವಾಗಬೇಕು

ನಾಲ್ಕು ದಿನದ ಬದುಕಿನ ಪುಸ್ತಕವ
ತೆರೆದು ಓದುವ ಮನಗಳಿರಬೇಕು
ಶಾಂತಿ ಸೌಹಾರ್ದದ ಕಿರಣಗಳಿರಬೇಕು
ಮಾನವ ಜನಾಂಗ ಒಂದೇ ಎಂಬ ಗ್ರಂಥವಾಗಬೇಕು

ಜೆ ಬಿ ನೂರ್ ಜಹಾನ್ ಬೇಗಂ
ದಾವಣಗೆರೆ