ಪರಿಣಾಮ
– ಜಿ ಎಲ್ ನಾಗೇಶ್
ಮುರಳಿಯ ಕ್ಷಣಿಕ ಸುಖಕ್ಕಾಗಿ ಆಕರ್ಷಿತಳಾಗಿ ಭಾರತಿ ಆ ದಿನ ಎಲ್ಲವನ್ನು ಮರೆತು ಕಣ್ಣಿದ್ದರೂ ಕುರುಡಾಗಿದ್ದಳು.
ಸಿನಿಮಾ, ಪಾರ್ಕು, ಪಾರ್ಟಿ…. ಅಂತ ಮನಸ್ಸು ಬಂದ ಕಡೆಗೆಲ್ಲ ತಿರುಗುತ್ತಾ ಮುರಳಿ ಜೊತೆ ಎಂಜಾಯ್ ಮಾಡಲಾರಂಭಿಸಿದಳು . ಕಳ್ಳ ಬೇಕು ಕಣ್ಣು ಮುಚ್ಚಿ ಕದ್ದು ಹಾಲು ಕುಡಿದಂತೆ ಪ್ರತಿದಿನ ರಸಿಕತೆಯ ಆಟ ಆಡಲಾರಲ್ಲಿಸಿದಳು. ಪಾಪ ಅವಳಿಗೆ ಗೊತ್ತಿರಲಿಲ್ಲ ಇದರ ಪರಿಣಾಮ ಮುಂದೆನಾಗುತ್ತದೆ ಅಂತ.ಕೆಲವು ತಿಂಗಳುಗಳು ಉರುಳುವುದರಲ್ಲಿಯೇ ಭಾರತಿಯ ಗಂಡನಾದ ರಂಗನಾಥನಿಗೆ ಅನುಮಾನ ಕಾಡಿತ್ತು. ಭಾರತಿ ಎಲ್ಲಿ ಹೋಗುತ್ತಾಳೆ ? ಏನು ಮಾಡುತ್ತಾಳೆ? ತನಗೆ ಬಂದಿರುವ ಅ ಅನುಮಾನ ಹೋಗಲಾಡಿಸಿಕೊಳ್ಳಬೇಕೆಂದು ರಂಗನಾಥ ಆ ದಿನವೇ ಭಾರತಿಯನ್ನು ಫಾಲೋ ಮಾಡಿದನು. ಆಗ ಅನಾವರಣಗೊಂಡಿತು ಭಾರತೀಯ ತೆರೆ ಮರೆಯ ರಸಿಕತೆಯ ರಾಸಲೀಲೆ.
ಭಾರತಿ ಮನೆಗೆ ಬಂದಿದ್ದಾಗ ರಂಗನಾಥ ಕೋಪ – ತಿರಸ್ಕಾರ, ಅಸಹ್ಯದಿಂದ ಮುಖಕ್ಕೆ ಕ್ಯಾಕರಿಸಿ ಉಗಿಯುವಂತೆ ರೋಷಗೊಂಡಿದ್ದನು.
ಅವಾಚ್ಯ ಶಬ್ದಗಳಿಂದ ಬೈಯುತ್ತಾ ಬಲವಾಗಿ ಅವಳ ಸೊಂಟಕ್ಕೆ ಜಾಡಿಸಿ ಒದ್ದನು.
ಭಾರತಿ ದಡಾರನೆ ಮುಗ್ಗರಿಸಿ ನೆಲಕೆ ಬಿದ್ದಳು.
ವ್ಯಾಗ್ರನಂತಾದ ರಂಗನಾಥ ಮನೆಯಲ್ಲಿಯ ಸೀಮೆಎಣ್ಣೆ ಅವಳ ತಲೆ ಮೇಲೆ ಸುರಿದು ಬೆಂಕಿಕಡ್ಡಿ ಗೀಚಿದನು.
ಆಗ – “ಅಪ್ಪ !” ಎಂದು ಅಳುತ್ತಾ ಆರು ವರ್ಷದ ಮಗು ಕೀರ್ತಿ ಅಡ್ಡ ಬಂದಿದ್ದಳು.
ರಂಗನಾಥನ ಕೈಯಲ್ಲಿದ್ದ ಬೆಂಕಿ ಕಡ್ಡಿ ನಂದಿತು.
ಮುಗ್ಧ ಮುದ್ದು ಮುಖದ ಮಗುವಿನ ಕಂಗಳ ಕಂಬನಿಯನ್ನು ಕಂಡು ಅವನ ಕೋಪ ಕರಗಿತ್ತು.
ತನ್ನ ಮಗುವಿಗಾಗಿ, ತನ್ನ ಮಗುವಿನ ಭವಿಷ್ಯಕ್ಕಾಗಿ ರಂಗನಾಥ ಹೆಂಡತಿ, ಮನೆ ಮಠ… ಎಲ್ಲವನ್ನು ಬಿಟ್ಟು ಉಟ್ಟ ಬಟ್ಟಿಯಲ್ಲಿಯೇ ತನ್ನ ಮಗುವಿನೊಂದಿಗೆ ಆದೋ ಎಲ್ಲಿಗೋ ಹೊರಟು ಹೋಗಿದ್ದ.
***
ಭಾರತಿ ಸಂಪೂರ್ಣ ಹೌಹಾರಿದ್ದಳು.
ಅವಳು ಅಳುತ್ತಿದ್ದಳು.
ಈಗ ಅತ್ತರೆ ಏನು ಪ್ರಯೋಜನ ?
ಅಳುತ್ತಿರುವ ಭಾರತಿಗೆ ಪ್ರಿಯಕರ ಮುರಳಿ ಧೈರ್ಯ ಮತ್ತು ಸಮಾಧಾನ ಹೇಳಿದನು.
ಮುರಳಿಯ ಪ್ರೀತಿಯ ಆಸರೆಯಲ್ಲಿ ಭಾರತಿ ಬಹುಬೇಗನೆ ಎಲ್ಲವನ್ನು ಮರೆತು ಮೊದಲಿನಂತಾದಳು.
ಭಾರತಿ-ಮುರಳಿ ಮೊದಲಿನಂತೆ ತಮ್ಮ ಆ ಹಳೆ ಜಾಳಿಯನ್ನೇ ಮುಂದುವರಿಸಿದರು.
ಆಗ ಮುಂದೆ ಮತ್ತೇನು ನಡೆಯಿತು?
***
ಮುರಳಿಯ (ಧರ್ಮ)ಪತ್ನಿ ಸುಮಾ ಮತ್ತು ಸುಮಳ ತಮ್ಮ ಬಲಭದ್ರ ಕೂಡಿಕೊಂಡು ಅದೇನೋ ಸಂಚು ರೂಪಿಸಿದರು.
“ಆ ಭಾರತಿ ಮುಂಡೆಗೊಂದು ಗತಿ ಕಾಣಿಸಿ ನಿಮ್ಮಿಬ್ಬರ ಸಂಸಾರ ಜೀವನ ಸರಿ ಹೊಂದುವಂತೆ ಮಾಡ್ತೇನೆ ನೀನು ನಿಶ್ಚಿಂತೆಯಿಂದ ಇರು ಅಕ್ಕ” ಎಂದು ಹೇಳಿದನು ಬಲಭದ್ರ.
***
ಬಲಭದ್ರ ಗೋಮುಖವ್ಯಾಘ್ರನಂತೆ ನುಗ್ಗಿದನು.
ಮುರಳಿ ಕೋಪದಿಂದ ಅತನ ಎದೆಗೆ ಒದ್ದನು.
ಚೇತರಿಸಿಕೊಂಡು ಮೇಲೆದ್ದ ಬಲಭದ್ರ ಅದೇನೇನೋ ಸುಳ್ಳುಗಳನ್ನು ಹೇಳಿದನು.
ಅಪಾಯವನ್ನು ಅರಿತ ಬಲಭದ್ರ ತಡ ಮಾಡದೆ ಕಾಲಿಗೆ ಬುದ್ಧಿ ಹೇಳಿದನು.
ಆಗ ಮುರಳಿ ಕೋಪ ಮತ್ತು ತಿರಸ್ಕಾರದಿಂದ-
“ಭಾರತಿ… ನಾನು ನಿನ್ನನ್ನು ಪ್ರೇಮ ದೇವತೆ ಅಂತ ತಿಳ್ಕೊಂಡಿದ್ದೆ. ಆದರೆ ನೀನು… ನೀನಿಂಥ ಕೊಳಕು ಸೂ…! ಅಂತ ನಾನ್
ಅನ್ಕೊಂಡಿರ್ಲಿಲ್ಲ ಭಾರತಿ!”
“ನಾನು ಅಂತವಳಲ್ಲ ಮುರಳಿ, ದಯವಿಟ್ಟು ನನ್ನ ನಂಬಿ.”
“ನಾನು… ಇನ್ನು ನಿನ್ನನ್ನು ನಂಬಬೇಕಾ? ಎಂದೆಂದಿಗೂ ನಿನ್ನನ್ನು ನಂಬಲು ಸಾಧ್ಯವಿಲ್ಲ. ನೀನು ಇವತ್ತು ಎನು ಅನ್ನೊದು ಪ್ರೂವ್ ಮಾಡಿ ತೋರಿಸಿರುವಾಗ ಇನ್ನೂ ಸಹ ನಾನು ನಿನ್ನಂತವಳನ್ನು ನಂಬಬೇಕ ? ಇಲ್ಲಿವರೆಗೂ ನಿನ್ನಂಥವಳನ್ನು ನಂಬಿ ನಾನು ಹಾಳಾಗಿದ್ದು ಸಾಕು. ಇನ್ನು ಮುಂದೆಯಾದರೂ ನಾನು ಎಚ್ಚೆತ್ತುಕೊಂಡು ಒಬ್ಬ ಒಳ್ಳೆ ಮನುಷ್ಯನಾಗಿ ಬಾಳಲು ಪ್ರಯತ್ನಿಸುತ್ತೇನೆ.
ಇವತ್ತಿಗೆ ನನ್ನ ನಿನ್ನ ಋಣಾನುಬಂಧ ಮುಗುದೋಯ್ತು.
ದಯವಿಟ್ಟು ಇನ್ನು ಮುಂದೆ ನನ್ನ ತಂಟೆಗೆ ಬರಬೇಡ . ಬಂದರೆ ನೀನು ಬದುಕುಳಿಯಲ್ಲ!” ಎಂದಬ್ಬರಿಸಿ ಅಲ್ಲಿಂದ ಹೋಗುತ್ತಿರುವಾಗ ಬೆಚ್ಚಿಬಿದ್ದಿದ್ದ
ಭಾರತಿ-
“ನಿಂತ್ಕೊಳ್ಳಿ ಮುರಳಿ. ನನ್ನ ನಂಬಿ ಮುರಳಿ”ಎಂದು ಹೇಳುತ್ತಾ ಕೈ ಹಿಡಿದು ತಡಿಲೆತ್ನಿಸಿದಾಗ –
“ಥೂ… ತಿರಸ್ಕಾರ ಇರ್ಲಿ ನಿನ್ನಂತ ಕೊಳಕು ಸೂಳಿಯರಿಗೆ ! ನಿನ್ನ ಮುಖ ನೋಡುತ್ತಿದ್ದರೆ ಅಸಹ್ಯ- ಹೇಸಿಗೆ ಉಂಟಾಗುತ್ತದೆ ನನಗೆ. ಬಿಡೆ ನನ್ನ ಕೈಯನ್ನ!”ಎಂದು ಪುನ: ಅಬ್ಬರಿಸುತ್ತಾ ಬಲವಾಗಿ ಅವಳನು ಹಿಂದಕ್ಕೆ ತಳ್ಳಿದನು .
ಭಾರತಿ ನೆಲಕ್ಕೆ ದಡಾರನೆ ಮುಗ್ಗರಿಸಿದಳು.
ಆಗವಳ ಸಹನೆಯ ಕಟ್ಟೆ ಒಡೆದು-
“ಮುರಳಿ…! ” ಎಂದು ಅರಚಿದಳು.
“ಥೂ ಕತ್ತೆ ಮುಂಡೆ!”ಎಂದು ದುರುಗುಟ್ಟಿ ನೋಡಿ ಅಲ್ಲಿಂದ ಹೊರಟು ಹೋಗಿದ್ದನು.
ಕುಡಿತದ ಮತ್ತಿನಲ್ಲಿದ್ದ ಮುರಳಿ ಆಗ ತಾಳ್ಮೆ ಮತ್ತು ಯೋಚಿಸುವ ಶಕ್ತಿ ಕಳೆದುಕೊಂಡಿದ್ಥನು.
ಭಾರತಿ ಹೌಹಾರಿದಳು.
“‘ಅಯ್ಯೋ… ! ಇದೆಂಥ ವಿಚಿತ್ರ ಈ ಬದುಕು. ನಾನು ಮಾಡಿರುವ ತಪ್ಪಾದರೂ ಏನು? ನಾನೀಗ ಯಾರಿಗೋಸ್ಕರ ಬದುಕುಳಿಯಲಿ ? ಈ ನನ್ನ ಕೊಳಕು ಬದುಕಿಗೆ ಏನರ್ಥ ಇದೆ ಅಂತ ನಾನು ಬದುಕುಳಿಯಲಿ ?
ಇಲ್ಲ…! ನಾನು ಬದುಕುಳಿಯಲು ಸಾಧ್ಯ ಇಲ್ಲ ! ನಾನು ತಪ್ಪು ಮಾಡಿದ್ದೇನೆ! ಭಾರತಿ ತಪ್ಪು ಮಾಡಿದ್ದಾಳೆ! ಪಾಪಿ ನಾನು. ಪ್ರೀತಿ ಪ್ರೇಮದ ಬಲೆಗೆ ಸಿಕ್ಕೂ ಕಟ್ಟಿಕೊಂಡ ಗಂಡ ಮತ್ತು ಮಗಳನ್ನು ದೂರ ಮಾಡಿಕೊಂಡೆ . ನಂಬಿರುವ ಪ್ರಿಯಕರನು ಈ ರೀತಿ ನಡು ನೀರಲ್ಲಿ ಅಪಾರ್ಥ ಮಾಡಿಕೊಂಡು ಮೋಸ ಮಾಡಿ ಹೋದರೆ ನಾನೇನು ಮಾಡಲಿ ? ನಾನೀಗ ಯಾರಿಗಾಗಿ ಬದುಕಲಿ ? ಇಲ್ಲ ! ನಾನಿನ್ನು ಬದುಕಬಾರದು. ಗಂಡನನ್ನು ಮೋಸ ಮಾಡಿದ ನನಗೆ ತಕ್ಕ ಶಿಕ್ಷೆಯಾಗಬೇಕು. ನಾನೀಗ ಸಾಯಲೇಬೇಕು, ನನ್ನ ಈ ಬದುಕು ದುರಂತದಲ್ಲಿ ಅಂತ್ಯಗೊಳ್ಳಬೇಕು…! ” ಎಂದು ಭಾರತಿ ದು:ಖಭರಿತಳಾಗಿ ತನ್ನೇರಡು ಕಣ್ಣುಗಳು ಮುಚ್ಕೊಂಡು ಭೋರ್ಗರಿಯುತ್ತಾ ಹರಿಯುತ್ತಿರುವ ಮುಲ್ಲಾಮಾರಿ ನದಿಗೆ ಧುಮ್ಕಿದಳು.
ದೊಡ್ಡ ಅಲೆಯೊಂದು ತನ್ನ ಕೆನ್ನಾಲಿಗೆ ಚಾಚಿ, ಆಕೆಯನ್ನು ಬರ ಮಾಡಿಕೊಂಡಿತ್ತು.
ಇಹಲೋಕದಿಂದ ಪರಲೋಕ ಸೇರಿಕೊಂಡಿದ್ದಳು ಭಾರತಿ.
–ಜಿ.ಎಲ್.ನಾಗೇಶ.
ಧನ್ನೂರ್ ಆರ್.
ಬಸವಕಲ್ಯಾಣ
